विशेष अब नेपाली युवाले खाडी मुलुकमा पसिना बगाउनु पर्दैन : ओली
Ujyaalo

रमेश गिरी/उज्यालो ।

भक्तपुर, मंसिर २८ –नेकपा(एमाले)का अध्यक्ष केपी शर्मा ओलीले अब बन्ने सरकारले स्वदेशमै राम्रो पारिश्रमिकसहितको रोजगारीको व्यवस्था गर्न प्राथमिकताका साथ लाग्ने बताउनु भएको छ ।

बिहीबार आफ्नै निवास बालकोटमा उहाँले नेपाल उद्योग वाणिज्य महासंघका पूर्व अध्यक्षको नेतृत्वमा आएको टोलीको ज्ञापन पत्र बुझ्दै स्वदेशमै रोजगारीको व्यवस्था गर्न सके खाडी मुलुकमा गएर युवाले पसिना बगाउनु नपर्ने बताउनु भएको हो ।

विभिन्न राजनीतिक परिवर्तनले जनतामा नयाँ–नयाँ आकांक्षा जन्माउने बताउँदै उहाँले यसपल्टको निर्वाचन पनि त्यस्तै एउटा परिवर्तन भएको बताउनुभयो । यस पल्टको चुनावले जनतामा विकास र समृद्धिको आकांक्षा जन्माएको बताउनुभयो ।

अध्यक्ष ओलीले ०४६ सालको परिवर्तनपछि देशमा निजीकरणका नाममा भ्रष्टिकरण बढेको चर्चा गर्दै उहाँले भन्नुभयो, ‘निजीकरण र उदारीकरणका नाममा देशमा भएका ३८ वटा उद्योगहरु कांग्रेसको पालामा बेचिए, जसले गर्दा स्वेदशमा भएको रोजगारी समेत गुमेर अहिले लाखौं युवा खाडीमा पसिना बगाइरहेका छन् ।’

सम्पत्ती शुद्धिकरणका नाममा व्यावसायीहरुलाई आफ्नो पुँजीलाई सहज ढंगले परिचालन गर्न रोक लगाएकोमा चिन्ता व्यक्त गर्दै बताउँदै उहाँले आफ्नै खाताबाट १० लाख रुपैंयाभन्दा बढी रकम झिक्न बन्देज लगाएपछि लगानीको वातावरण बन्न नसकेको बताउनुभयो ।

ओलीले भननुभयो, ‘सरकारको काम लगानी मैत्री वातावरण बनाएर व्यावसायीसँग कर उठाउने हो तर अनावश्यक बखेडा झिकेर गैर कानुनी रकम आजर्न गर्ने होइन ।’ उहाँले आगामी सरकार देश निर्माणका लागी निजी क्षेत्रसँग हातेमालो गर्न तयार रहेको प्रतिवद्धता व्यक्त गर्नुभयो ।

अध्यक्ष ओलीले निजी क्षेत्रले विकास र समृद्धिका लागि उत्प्रेरकको भूमिका निर्वाह गर्ने र सरकारले त्यसलाई सहज हुने गरी नीति बनाएर सहकार्य गर्ने बताउनुभयो । महासंघका पूर्व अध्यक्षहरु महेशलाल प्रधान, पद्म ज्योती, प्रदिप कुमार श्रेष्ठ, रविभक्त श्रेष्ठ, विनोदबहादुर श्रेष्ठ, कुशकुमार जोशी, सुरज वैद्य र भाष्करराज कर्णिकारले संयुक्त हस्ताक्षर गरेर बुझाएको ज्ञापनपत्रमा देशको संक्रमणकाल अन्त्यका लागि प्रमुख विपक्षी दलका नेताको हैसियतमा ओलीले निर्वाह गरेको भूमिकाको उच्च प्रशंसा गरिएको छ ।

सरकारसँग उद्योग, मजदुर, देशको आवश्यकता, उत्पादन जस्ता कुनै पनि क्षेत्रको यकिन तथ्यांक नभएकोले व्यावसायिक क्षेत्र अनुमानका भर सञ्चालन भइरहेको भन्दै उहाँले भन्नुभयो, ‘नाडी छामेका भरमा रोगको शंका गरेर शंकाकै भरमा औषधी खुवाइँदैछ, अब यस्तो हुदैन, सबै क्षेत्रका खास समस्या पहिचान गरेर त्यसै अनुसार समाधान पनि खोजिनेछ ।’

 

 

Share It

Post Comments
थप विशेष