विशेष ४५ जिल्लाका सबै केन्द्रमा उत्साहजनक रुपमा मतदान चल्दै
Ujyaalo

काठमाडौं, मंसिर २१ – बिहीबार ४५ जिल्लाका १२८ निर्वाचन क्षेत्रमा उत्साजनक रुपमा मतदान भैरहेको छ । सबै ठाउँमा शान्तिपूर्ण रुपमा मतदान भैरहेको निर्वाचन आयोगले जनाएको छ ।

आज कुन प्रदेशमा मतदान ?

प्रदेश नम्बर १

प्रदेश नम्बर एकका ७ वटा जिल्लामा आज मतदान भैरहेको छ । यी जिल्लामा २१ वटा निर्वाचन क्षेत्र रहेका छन् । यसअघि सातवटा जिल्लाका सात वटा निर्वाचन क्षेत्रमा चुनाव भैसकेको छ ।

 

प्रदेश नम्बर एकका १४ जिल्लामा २८ वटा निर्वाचन क्षेत्र रहेका छन् । आज चुनाव हुने मोरङमा ६, झापामा ५, सुनसरीमा ४, इलाम र उदयपुरमा २/२ क्षेत्र छन् भने धनकुटा र तेह्रथुममा एक एक वटा निर्वाचन क्षेत्र रहेका छन् ।

प्रदेश नम्बर एकका २९ लाख ९३ हजार ७ सय ७४ मतदाता मध्य आज २२ लाख ७४ हजार ५ सय ९८ मतदाताले भोट हाल्दैछन् । आज चुनाव हुने प्रदेश नम्बर एकमा २ हजार ७ सय १८ वटा मतदान केन्द्र रहेका छन् ।

प्रदेश नम्बर २

प्रदेश नम्बर २ का सबै जिल्लामा आज मतदान भैरहेको छ । यो प्रदेशका ८ जिल्लामा चार चारवटा गरि ३२ वटा निर्वाचन क्षेत्र रहेका छन् ।

प्रदेश दुईका कुनैपनि क्षेत्रमा पहिलो चरणमा चुनाव भएको थिएन । प्रदेश नम्बर दुईमा सिरहा, सप्तरी, सर्लाही, धनुषा, महोत्तरी, बारा, पर्सा, रौतहट जिल्ला पर्छन् ।

 

यी जिल्लामा २७ लाख ६७ हजार ३ सय ७५ जना मतदाता रहेका छन् । आठ जिल्लामा ३ हजार ६ सय ७९ मतदान केन्द्र तोकिएको छ ।

प्रदेश नम्बर ३

प्रदेश नम्बर तीनका सातवटा जिल्लामा मतदान भैरहेको छ । १३ जिल्लाका ३३ वटा निर्वाचन क्षेत्र मध्य ६ वटा जिल्लामा पहिलो चरणमा चुनाव भैसकेको छ ।

आज मतदान भैरहेका काठमाडौंमा १०, भक्तपुरमा २, ललितपुरमा ३, काभ्रेपलान्चोकमा ३, चितवनमा ३, मकवानपुरमा २ र सिन्धुलीमा २ वटा निर्वाचन क्षेत्र रहेका छन् । यी क्षेत्रमा २० लाख ७३ हजार ३ सय ४४ जना मतदाता रहेका छन् ।

प्रदेश नम्बर तीनमा ३ हजार ७ सय ८५ मतदान केन्द्र रहेकोमा आज २ हजार ५ सय ३९ वटा मतदान केन्द्रमा चुनाव हुनेछ । अन्य ठाउँमा पहिलो चरणमै चुनाव भैसकेको छ । 

प्रदेश नम्बर ४

प्रदेश नम्बर चारका पाँचवटा जिल्लामा आज मतदान भैरहेको छ । ११ जिल्लाका १८ निर्वाचन क्षेत्र मध्य ६ वटा जिल्लामा पहिलो चरणमा चुनाव भएको थियो ।

आज चुनाव भैरहेका नवलपरासी पूर्वका २, तनहुँका २, काँस्कीका ३, स्याङ्जाका २ र पर्वतमा एउटा निर्वाचन क्षेत्र रहेका छन् । ६ जिल्लाका ७ वटा निर्वाचन क्षेत्रमा पहिलो चरणमा चुनाव भएको थियो ।

प्रदेश नम्बर चारका १५ लाख ६८ हजार ९ सय २४ जना मतदातामध्य आज चुनाव भैरहेका जिल्लामा १० लाख ५ हजार ९ सय मतदाता रहेका छन् । यी क्षेत्रमा १ हजार २ सय ७४ वटा मतदान केन्द्र तोकिएको छ ।

प्रदेश नम्बर ५

प्रदेश नम्बर ५ का १० वटा जिल्लामा आज मतदान भैरहेको छ । ५ नम्बर प्रदेशका १२ जिल्लामा २६ वटा निर्वाचन क्षेत्र रहेका छन् । यीमध्ये रुकुम पूर्व र रोल्पामा पहिलो चरणमा चुनाव भएको थियो ।

आज चुनाव हुने नवलपरासी पश्चिम, पाल्पा, अर्घाखाँची, गुल्मी, रुपन्देही कपिलवस्तु, दाङ, प्युठान, बाँके र बर्दियामा २४ वटा निर्वाचन क्षेत्र रहेका छन् ।

यो प्रदेशका २७ लाख ४० हजार ८ सय ६४ जना मतदाता मध्य आज चुनाव हुने क्षेत्रमा २५ लाख ८५ हजार ३ सय ७ जना मतदाता रहेका छन् । यो प्रदेशका ३ हजार ३ सय ६८ मतदान केन्द्र मध्य आज चुनाव हुने क्षेत्रमा ३ हजार १ सय ६६ मतदान केन्द्र रहेका छन् ।

प्रदेश नम्बर ६

प्रदेश नम्बर ६ का ५ वटा निर्वाचभन क्षेत्रमा मतदान भैरहेको छ । दैलेख र सुर्खेतका दुई दुई तथा सल्यानको एउटा निर्वाचन क्षेत्रमा दोश्रो चरणमा मतदान भैरहेको हो ।

प्रदेश नम्बर ६ का १० वटा जिल्लामा १२ वटा निर्वाचन क्षेत्र रहेका छन् । यीमध्ये ७ वटा जिल्लाका ७ वटा निर्वाचन क्षेत्रमा पहिलो चरणमा चुनाव भएको छ ।

यो प्रदेशका ८ लाख ४६ हजार ९ सय ४१ जना मतदाता मध्य दोश्रो चरणमा चुनाव हुने जिल्लामा ४ लाख ७८ हजार ७ सय ३४ जना मतदाता रहेका छन् । १ हजार २ सय ४३ मतदान केन्द्र मध्य दोश्रो चरणमा चुनाव हुने क्षेत्रमा ६ सय ३९ वटा मतदान केन्द्र तोकिएको छ ।

प्रदेश नम्बर ७

प्रदेश नम्बर ७ का ५ वटा जिल्लामा मतदान भैरहेको छ । प्रदेश नम्बर ७ का ९ वटा जिल्लामा १६ वटा निर्वाचन क्षेत्र रहेका छन् । यीमध्ये एक एक वटा निर्वाचन क्षेत्र रहेका ४ जजिल्लामा पहिलो चरणमा चुनाव भैसको छ ।

दोश्रो चरणमा चुनाव हुने कैलालीमा ५, कञ्चनपुरमा ३, डडेलधुरा, अछाम र डोटीमा एक एक वटा क्षेत्र रहेका छन् । प्रदेश नम्बर ७ का १४ लाख ३५ हजार ६ सय ७३ मतदाता मध्य १० लाख ५० हजार ७ सय ३२ जना दोश्रो चरणमा चुनाव हुने क्षेत्रका रहेका छन् ।

१ हजार ९ सय मतदान केन्द्र रहेको प्रदेश नम्बर ७ मा दोश्रो चरणमा चुनाव हुने क्षेत्रमा १ हजार ३ सय २९ वटा मतदान केन्द्र रहेका छन् ।

Share It

Post Comments
थप विशेष