विशेष टिकापुर घटनाका मुख्य योजनाकार एवं फरार चौधरीको अनपेक्षित नतिजा
Ujyaalo

नवराज पनेरु/उज्यालो
कैलाली, मंसिर २४ – टिकापुर घटनाका मुख्य योजनाकार भनिएका र प्रहरीको फरार सुचीमा रहेका रेशम चौधरीको अनपेक्षित अग्रताले धेरैलाई अचम्मित तुल्याएको छ । कैलाली क्षेत्र नंं १ मा राष्ट्रिय जनता पार्टीबाट उम्मेदवार बनेका चौधरीले कुल खसेको मतको झण्डै ७५ प्रतिशत मत पाईरहेका छन् ।


टिकापुर घटनाका मुख्य योजनाकारको आरोप खेपिरहेका चौधरीले प्रतिनिधि सभा सदस्य पदका लागि वारेश मार्फत उमेदवारी दर्ता गराएका थिए भने समर्थक र सामाजिक सञ्जाल मात्र चुनावी प्रचारप्रसार गरेका थिए ।
चौधरी विरुद्ध कर्तव्य ज्यान, ज्यान मार्ने उद्योग र हतियार डकैती सम्बन्धी तीन वटा मुद्दा दायर गरिएको छ ।


०७२ भदौ ७ गते भएको आन्दोलनमा प्रहरी वरिष्ठ उपरीक्षक लक्ष्मण न्यौपाने, केशव बोहरा र बलराम विष्ट गरी दुईजना प्रहरी निरीक्षक सहित ८ सुरक्षाकर्मी र एक दूधे बालकको हत्यामा रेशम चौधरीको प्रमुख हात रहेको प्रहरीको दाबी छ ।


तर अभियुक्त चौधरीलाई सरकारले १ करोड ७४ लाख क्षतिपूर्ति दिइसकेको छ । प्रचण्ड सरकारको बहिर्गमनको अन्तिम समयमा मन्त्रिपरिषद बैठकले टीकापुरका आगजनी पीडितलाई क्षतिपूर्ति दिने क्रममा सबैभन्दा बढी अभियुक्त चौधरीलाई सबैभन्दा बढी क्षतिपुर्ति उपलब्ध गराएको थियो ।


टिकापुर घटनाको भोलिपल्ट उत्तेजित भीडले चौधरीको फूलबारी एफएम, फूलबारी कटेज र एउटा मोटरसाइकलमा आगजनी गरेकोे थियो ।


सरकारले क्षतिपूर्ति बापत उपलब्ध गराएको १ करोड ७४ लाख रुपैयाँको चेक रेशम चौधरीका बुबा लालवीर चौधरीले बुझ्नु भएको थियो ।


चौधरीलाई ७५ प्रतिशत मत


का चौधरीले कुल खसेको मतको झण्डै ७५ प्रतिशत मत पाईरहेका छन् । पछिल्लो मत परिणाम अनुसार आफ्ना निकटतम् प्रतिद्वन्द्वीलाई ८ हजार भन्दा बढी मतले पछि पार्दै अग्रता बढाएका छन् । चौधरीले १० हजार ८ सय २७ मत प्राप्त गर्दा उनका निकटतम् प्रतिद्वन्द्वी वामगठबन्धनका उम्मेदवार नेकपा एमालेकी मदनकुमारी शाहले २ हजार ३१३ मत पाउनुभएको छ ।


सुरुवाती चरणबाटै तेस्रो स्थानमा रहेकी कांग्रेस नेतृ ईश्वरी न्यौपानेको भने १ हजार ६ सय १७ मत छ ।

Share It

Post Comments
थप विशेष