समाचार मुख्यमन्त्रीका दाबेदार शेरधन १३ हजार मतअन्तरले विजयी ; को हुन् शेरधन राई ?
Ujyaalo

भोजपुर, मंसिर २३ – भोजपुरको प्रदेशसभा ख मा एमालेका शेरधन राई विजयी हुनुभएको छ । वाम गठबन्धनका तर्फबाट उम्मेदवार रहेका उहाँले २० हजार ३ सय ३४ मत प्राप्त गर्नुभएको छ ।

उहाँका निकटतम प्रतिद्वन्दि काँग्रेसका गोविन्दकुमार कार्कीले ७ हजार १ सय ५ मत प्राप्त गर्नुभयो । उहाँहरुबिचको मतान्तर १३ हजार २ सय २९ हो । शेरधन यसअघि २ पटक भोजपुरबाट विजयी हुनुभएको थियो । जिल्ला निर्वाचन कार्यालयले यसको आधिकारिक घोषणा भने गर्न बाँकी छ । उहाँलाई प्रदेश नम्बर १ को मुख्यमन्त्रीको दाबेदारका रुपमा पनि हेरिएको छ ।

को हुन् शेरधन राई ?

२०३१ सालमा भोजपुरको थिदिंखामा जन्मिएका राईले समाजशास्त्र विषयमा स्नातकोत्तरसम्मको अध्ययन गर्नुभएको छ । यसअघि २ पटक भोजपुर २ बाट सांसद निर्वाचित भइसकेका राई यसपटक प्रदेश सभाको उम्मेदवार बन्नुभएको हो । २०५६ सालमा २५ वर्षको उमेरमा चुनाव जितेर प्रतिनिधिसभामा कान्छो सांसद बनेका राई अहिले एमालेको १ नम्बर प्रदेश सहसंयोजक हुनुहुन्छ ।

२०४४ सालदेखि अनेरास्ववियूमार्फत क्रियाशिल भएर भोजपुर जिल्ला कमिटी अध्यक्ष र २ कार्यकाल अनेरास्ववियू केन्द्रीय कमिटी सदस्य बनेका राई २०५०–२०५४ सम्म अनेरास्ववियूको पूर्वाञ्चल प्रमुख बन्नुभयो ।

उहाँ नेकपा एमाले भोजपुरको प्रमुख पदमा ४ कार्यकाल निर्विरोध निर्वाचित हुनुभयो । उहाँले २०४४ देखि २०४६ चैत २६ गतेसम्म भूमिगत जीवन पनि बिताउनुभएको थियो । अविवाहित राई अहिले काठमाडौंमा बस्नुहुन्छ । उहाँ केपी शर्मा ओली नेतृत्वको सरकारमा सञ्चारमन्त्री बन्नुभएको हो ।

 

 

 

 

 

 

 

 

Share It

Post Comments
थप समाचार