समाचार गोपालमानको संसद यात्रामा ब्रेक लाग्यो, स्याङ्जा–२ मा एमालेकी पद्मकुमारी विजयी
Ujyaalo

काठमाडौं, मंसिर २७ – स्याङ्जा क्षेत्र नम्बर २ मा एमालेकी पद्मकुमारी अर्यालसँग नेपाली कांग्रेसका पुराना नेता गोपालमान श्रेष्ठ पराजित हुनुभएको छ । प्रतिनिधिसाभा सदस्यका लागि भएको चुनावमा क्षेत्र नम्बर २ बाट एमालेकी अर्याल ३५ हजार १ सय ४१ मत प्राप्त गरी विजयी हुनुभएको हो ।

उहाँका प्रतिस्पर्धी श्रेष्ठले ३१ हजार ४ सय ३६ मत प्राप्त गर्नुभयो । नेतृ अर्याल ०७० सालको संविद्यानसभामा समानुपातिकबाट सांसद बन्नुभएको थियो । बुथकब्जा लगायतको विवादमा दुईदिन रोकिएको स्याङ्जामा अन्ततः गोपालमान श्रेष्ठ पराजित हुनुभएको हो ।

कांग्रेसका निकै पुराना नेता, गोपालमान श्रेष्ठ । २०१९ सालदेखि राजनीतिमा लाग्नुभएका गोपालमान श्रेष्ठ स्याङ्जाकै स्थानीय बासिन्दा पनि हुनुहुन्छ । श्रेष्ठले ४ पटक सांसदको यात्रा पूरा गरिसक्नुभएको छ । श्रेष्ठ २०४८ र २०५६ सालमा प्रत्यक्ष निर्वाचित हुनुभयो ।

२०६४ साल र २०७० सालको संविद्यानसभामा भने उहाँ समानुपातिक सांसद हुनुभयो । उहाँ अहिलेसम्म ४ पटक मन्त्री बन्नुभएको छ । २०४८ सालमा वाणिज्यमन्त्री, २०५८ मा वनमन्त्री, २०६३ मा भौतिक पुर्वाधार तथा यातायातमन्त्री बनेका गोपालमान श्रेष्ठ २०७४ सालको जेठदेखि उपप्रधानमन्त्री तथा शिक्षामन्त्री हुनुहुन्छ । पार्टीमा पनि श्रेष्ठ उपसभापति समेत बन्नुभयो ।

वर्तमान शिक्षामन्त्री समेत रहेका श्रेष्ठ शिक्षा ऐन नवौं संशोधन पारितपछि विवादित बन्नुभएको थियो । गोल्डेन हेन्डचेक लिन फारम भरेकाले पनि परिक्षामा सहभागी हुन पाउने तथा शिक्षक सेवा आयोगको परिक्षामा अस्थायी शिक्षकले ७५ प्रतिशत आन्तरिक प्रतिस्पर्धा र २५ प्रतिशत खुल्ला प्रतिस्पर्धा हुने विवादास्पद ऐन पारित भएपछि श्रेष्ठ आलोचित बन्नुभएको थियो ।

परिक्षामा फेल भएका शिक्षकहरुले पनि गोल्डेन हेन्डसेक प्राप्त गर्न सक्ने उदार नीतिलाई कतिपयले सकारात्मक विभेद भनेपनि धेरैले शिक्षा माथिको कालो दाग भनेर श्रेष्ठको आलोचना गरेका छन् । शिक्षा ऐनको विद्यार्थी संगठनले अझै विरोध गरिरहेका छन् ।

Share It

Post Comments
थप समाचार