समाचार सोलुखुम्बुमा १८ जनामध्ये १२ जनाको जमानत नै जफत
Ujyaalo

सुबास दर्नाल/उज्यालो

सोलुखुम्बु, मंसिर २७ –प्रतिनिधिसभा र प्रदेशसभा सदस्यका लागि सोलुखुम्बुबाट उम्मेदवार बनेकामध्ये विजेता र उपविजेता बाहेक सबैको जमानत जफत भएको छ । सोलुखुम्बुबाट १८ जना प्रतिनिधिसभा र प्रदेशसभा सदस्यका लागि उम्मेदवार बनेकोमा १२ जनाको जमानत जफत भएको छ ।

प्रतिनिधिसभा र प्रदेशसभा सदस्य निर्वाचन ऐन २०७४ अनुसार उम्मेदवार बनेका सोलुखुम्बुबाट १८ जनामध्ये १२ जना उम्मेदवारले निर्वाचन ऐन अनुसारको मत ल्याउन नसक्दा जमानत जफत भएको हो । प्रतिनिधिसभा र प्रदेशसभा सदस्य निर्वाचन ऐन २०७४ को दफा–७१ को उपदफा–१ बमोजिम १२ जना उम्मेदवारको जमानत जफत भएको मुख्य निर्वाचन अधिकृतको कार्यालय सोलुखुम्बुका सहायक निर्वाचन अधिकृत मुरारी वस्तीले जानकारी दिनुभयो ।

प्रतिनिधिसभा र प्रदेशसभा सदस्य निर्वाचन ऐन २०७४ को दफा–७१ को उपदफा–१ मा चुनावमा जम्मा सदर मतको १० प्रतिशतभन्दा कम मत ल्याउने उम्मेदवारको धरौटी जफत हुने व्यवस्था रहेको छ । ऐनमा गरिएको व्यवस्थाअनुसार प्रतिनिधिसभा सदस्यतर्फ ५ जना, प्रदेशसभा १ को एक स्वतन्त्र सहित ४ जना र प्रदेश सभा २ को ३ जना गरी १२ जना उम्मेदवारको जमानत जफत भएको मुख्य निर्वाचन अधिकृतको कार्यलय सोलुखुम्बुले जनाएको छ ।

Share It

Post Comments
थप समाचार